Amerikalı iş adamı və sahibkar İlon Maskın aktivləri 39 milyard dollar dəyərində olsa da, əslində onun nəğd sərvəti azdır.

Dogruxeber.az-ın lenta.ru-ya istinadən verdiyi xəbərə görə, milyarderin maddi vəziyyətini "Wall Street Journal" araşdırıb.

Nəşrin məlumatına əsasən, Mask "Tesla" və "SpaceX" səhmlərini girov qoyaraq, kreditlər hesabına "dolanır".

Sahibkarın özü pula ehtiyacı olmadığını iddia etsə də, onun banklara borcu 500 milyon dolları ötüb. 2019-cu ildə o, "Tesla" səhmlərinin təxminən yarısını girov qoyub. O zaman səhmin dəyəri 15 milyard dollar təşkil edib.

2019-cu ildə Mask öz tvitində britaniyalı dalğıc Vernon Ansvortu “pedofil” adlandırdığı üçün 75.000 dollarlıq təzminat ödəməli olub. Həmin vaxt iş adamının vəkili müvəkkilinin kompensasiya ödəmək üçün kifayət qədər şəxsi vəsaitinin olmadığını və sərvətinin çox hissəsinin səhmlərdə olduğunu deyib.

Sahibkar "Tesla" səhmlərinin 20 faizinə sahibdir. Hazırda onların dəyəri 28 milyard dollardır. Lakin Mask qiymətli kağızları sata bilməz, əks halda şirkətə nəzarəti əldən verəcək.

"Tesla" səhmlərinin qiyməti müəyyən səviyyədən aşağı düşsə, banklar kreditlərin vaxtından əvvəl ödənilməsini və ya dəyər fərqini kompensasiya etməsini tələb edə bilər. Bu isə səhmlərin qiymətində əlavə enişə səbəb olacaq.

Lakin nəşrin bildirdiyinə əsasən, hazırda belə ssenari gözlənilmir, çünki 2020-ci ilin əvvəlindən "Tesla" şirkətinin səhmləri 96 faiz artıb.

Qeyd edək ki, may ayında Mask əmlakını satışa çıxarıb.