DogruXeber.az: - Sentyabrın 3-də Ermənistan mətbuatında yayılan xəbərlərdə, adı məlum olmayan 3-cü bir ölkə tərəfindən 44 günlük savaşın kosmik çəkilişləri erməni müxalifətinə ötürülüb. Sözügedən görüntülərdə Azərbaycanın hücum taktikaları və erməni qüvvələrinin məğlubiyyətinin öz əksini tapdığı bildirilir.

Lakin əsas maraq doğuran məqam revanşist erməni müxalifətinin əlini Nikol Paşinyanın qarşısında gücləndirəcək planın kimin başının altından çıxmasıdır.

Qeyd olunan məsələ ilə bağlı Milli Məclisin deputatı Razi Nurullayev Bizim.Media-ya verdiyi müsahibəsində görüntülərin erməni müxalifətinə əsasən Rusiya tərəfindən ötürülməsi variantının üzərində dayanıb:

“Ola bilsin ki, Paşinyanın əlində sözügedən görüntülər əvvəlcədən var idi. Lakin Nikolun görüntüləri rəqib tərəfə ötürməsi, təbii ki, mümkün deyil. Belə olan halda isə Rusiya variantı irəli çıxır. Çünki həmin görüntülərin Moskvanın əlində olması birmənalıdır. Bundan əlavə, Fransa, ABŞ, İranın da bu cür kosmik imkanları mövcuddur. Lakin Fransa və Birləşmiş Ştatların Paşinyanla münasibətləri heç də pis deyil və onlar Nikolun mövqeyinə zərbə vurmaq istəməzlər. Ümumilikdə isə Rusiyanın erməni müxalifəti ilə yaxınlığını nəzərə alsaq, Kremlin bu addımı atması daha real görünür”.

Millət vəkili Rusiyanın hansı məqsədlə görüntüləri Ermənistan müxalifətinə ötürə biləcəyini də izah edib:

“44 günlük Vətən Müharibəsi dönəmində də Moskva günahı erməni diasporasının üzərinə ataraq, Ermənistan tərəfini silahlandırırdı. Ola bilsin ki, Rusiyanın yenə də hər hansı maraqları və planı var, və bunu həyata keçirməyə çalışır. Bundan irəli gələrək Rusiya Paşinyana, hətta ola bilsin ki, Azərbaycana təzyiq göstəmək, eyni zamanda hər hansı başqa məqsədinə nail olmaq üçün görüntüləri erməni müxalifətinə ötürə bilər. Bundan əlavə Rusiya Ermənistanın faktiki olaraq sahibidir və İrəvan Moskvanın sözü ilə hərəkət edir. Kreml də əlindəki imkanlardan istifadə edərək bu cür variantlarla vaxtaşırı olaraq erməni siyasətçilərinə təzyiq göstərib. Yəqin ki, Rusiya hər hansı maraqları səbəbindən kosmik çəkilişləri erməni müxalifətinə ötürüb”.

Razi Nurullayev kosmik görüntüləri ötürən tərəf kimi İranı da istisna etməyib:

“Təbii ki, İran da bu addımı atmış ola bilər. Lakin indiki vəziyyətdə bunu demək çətindir. Çünki həmin görüntülərdə hansı faktların və hərbi sirlərin əks olunduğu hələlik məlum deyil. Eyni zamanda Tehranın erməni müxalifətindən hansı yöndə istifadə etmək istəməsi də qeyri-müəyyəndir. Yalnız qeyd olunan faktlar məlum olduqdan sonra məsələ ilə bağlı dolğun fikir söyləmək mümkündür”.