"DogruXeber.az" xəbər verir ki, İmişli rayonu Aranlı kənd orta məktəbində gündəmə gələn tualet problemi ilə bağlı Elm və Təhsil Nazirliyi Demokrat.az-ın sorğusunu cavablandırıb.

Belə ki, sorğuya cavabda adıçəkilən məktəbdə 3 sanitar qovsağın olduğu qeyd olunub:

"Mil-Muğan Regional Təhsil İdarəsindən bildirilir ki, İmişli rayonu Aranlı kənd tam orta məktəbində 3 sanitar qovşaq var. Məktəb qəzalı vəziyyətdə olduğundan 2023-cü ildə yeni məktəb binasının layihələndirilmə işlərinə başlanılacaq. Bununla yanaşı, məktəb ən qısa müddətdə mümkün olan variantla (mobil sanitar qovşağı və ya digər) təmin ediləcək və məsələ müsbət həllini tapacaq".

"Məlumat üçün bildirək ki, həmin məktəbin ibtidai sinif müəllimi Leyla Nəcəfquliyevaya 7-8 dekabr 2022-ci il tarixlərində məktəb rəhbərliyinə heç bir məlumat vermədən üzrsüz səbəbdən iş yerinə gəlmədiyinə, əmək müqaviləsi üzrə müəyyən edilmiş vəzifə funksiyalarını və müəssisədaxili intizam qaydalarını pozduğuna görə Əmək Məcəlləsinin 186-cı maddəsinin 2-ci hissəsinin "a" bəndinə uyğun olaraq töhmət verilib. Qeyd edək ki, 2022-ci il ərzində Mil-Muğan Regional Təhsil İdarəsinin tabeliyində olan 11 ümumi təhsil müəssisəsinin sanitar qovşağı yenilənib və ya əsaslı təmir edilib. Həmçinin 13 məktəbdə mobil sanitar qovşağı quraşdırılıb. Eyni zamanda İmişli rayonu üzrə 5 məktəbin sanitar qovşağı yenilənib və ya əsaslı təmir edilib, 2 məktəbdə mobil sanitar qovşağı quraşdırılıb" - deyə nazirlikdən saytımıza bildirilib.

Qeyd edək ki, İmişli rayon Aranlı kənd 1 saylı tam orta məktəbində müəllim dərsi boykot edərək, ayaqyolu tikilənə qədər şagirdlərdən də məktəbə gəlməmələrini istəyib. Daha sonra problemi gündəmə gətirən Leyla müəllimə baş verən biabırçı duruma görə direktoru təqsirkar sayıb.