Əmək və Əhalinin Sosial Müdafiəsi Nazirliyinin tabeliyində olan Dayanıqlı və Operativ Sosial Təminat (DOST) Agentliyinin elan etdiyi tender müsabiqəsinin qalibi məlum olub.

"DogruXeber.az" Yeniavaz.com-a istinadən xəbər verir ki, Agentliyin “3 saylı Bakı DOST Mərkəzi” üçün inzibati bina sahəsinin icarəyə götürülməsi ilə bağlı tenderinin qalibi “Faktor Qrup-S-1” QSC (VÖEN - 1604133621) olub.

DOST Agentliyi “Faktor Qrup-S-1” QSC-dən ümumi sahəsi 2 490 kv. metr olan qeyri-yaşayış sahəsini icarəyə götürəcək və qarşılığında 1 milyon 792 min 800 manat 2 qəpik ödəniləcək.

Məlumat üçün bildirək ki, bu ayın əvvəlində İqtisadiyyat Nazirliyi yanında Dövlət Vergi Xidməti Bakı şəhər Lokal Gəlirlər Baş İdarəsi də “Faktor Qrup-S-1” QSC-dən qeyri-yaşayış sahəsini icarəyə götürüb və qarşılığında 1 milyon 435 min 140 manat ödəniləcək.

Qeyd edək ki, dövlət qurumlarına milyonluq ofisləri icarəyə verən “Faktor Qrup-S-1” QSC “Faktor Qrup-S” QSC-nin yenidən təşkili nəticəsində yaradılıb. Hər iki şirkətin hüquqi ünvanı Heydər Əliyev pr. ev 189-da yerləşir. “Faktor Qrup-S-1” QSC 2020-ci ildə, “Faktor Qrup-S” QSC isə 2007-ci ildə dövlət qeydiyyatına alınıb. Ötən ay daha bir şirkət – “Company FSL” MMC (VÖEN – 1405481101) fəaliyyətinə xitam verərək “Faktor-Qrup-S-1” QSC-yə birləşib.

Onu da qeyd edək ki, Dövlət Vergi Xidmətinin yenilənmiş “Kommersiya qurumlarının dövlət reyestri məlumatları”nda adları qeyd oluna şirkətlər barəsində məlumatlar mövcud deyil.