DogruXeber.az: - “Xəzər dənizində dayazlaşma problemi keçən əsrdən baş verməyə başlayıb. Ən çox səviyyə -29 metrəyə qədər enib. Bu rekord azalma 1977-ci ildə baş verib. Dayazlaşmanın müxtəlif səbəbləri var. Sudan istifadə, buxarlaşma, çayların səviyyəsinin azalması əsas səbəblərdəndir. Xəzərin su təminatının 80%-ni Volqa çayı təmin edir. Volqa çayı 8000 kub metr saniyə sürətlə axan böyük çaydır. Kürlə müqayisə etsək, olduqca böyükdür. Həmin çayda suyun azalması Xəzərə ciddi təsir göstərir. İqlim dəyişikliyi də dayazlaşmaya zəmin yaradır. Atlantik Okeanda olan dəniz dalğaları Volqanın şimal hissəsində suyun azalmasına səbəb olur. Hava axınları Volqa çayına çatmır. Bu elə də ciddi faiz deyil. Ancaq Rusiyanın 45% sənaye sahəsi Volqanın hövzəsində yerləşir”.

Bu sözləri Demokrat.az-a açıqlamasında “Sağlam həyata doğru” Ekoloji İctimai Birliyinin sədri Sadiq Həsənov deyib.

“Ekologiya və Təbii Sərvətlər Naziri Muxtar Babayevlə rusiyalı həmkarının görüşməsi böyük hadisədir. Su balansının artması haqqında danışıqlar əhəmiyyətlidir. Volqa çayında suyun səviyyəsinin artmasına nail olmaq mümkün ola bilər. Ural və Terek çaylarında da suyun səviyyəsi aşağıdır. Qazaxıstanda və Rusiyada bu çayların istifadəsi dayazlaşma yaradır”.

O bildirib ki, Kür çayının illərdir dayazlaşmasının şahidi oluruq:

“Hətta keçən il Kür çayı Xəzərə çatmırdı. Xəzərdə dayazlaşma 2050-ci ilə qədər davam edəcək. Su təsərrüfatında baş verən israfçılıq və iqlim dəyişikliyi bunda rol oynayır. Ümid edirik ki, bu səviyyə rekord dayazlaşmaya çatmayacaq. Bu fəlakətin başlanğıcı ola bilər. Razılaşmalar nəticəsində çaylarda suyun səviyyəsinin artması vəziyyəti normallaşdırar. Ən azından azalmanın sürətini zəiflədə bilərik”.