Kəskin ürək çatışmazlığından əziyyət çəkən 40 yaşlı avstraliyalı kişi süni titan ürəklə 100 gün sağ qala bilən ilk insan olub.

"DogruXeber.az" BBC-yə istinadla xəbər verir ki, o, hazırda donor transplantasiyası gözləyərir.

Bildirilir ki, adının açıqlanmasını istəməyən Yeni Cənubi Uels (Avstraliyanın cənub-şərqində yerləşən ştat) sakini tam süni ürək qəbul edən Avstraliyada ilk, dünyada altıncı insandır.

İlk beş implantasiya keçən il ABŞ-də həyata keçirilib. Daha sonra sözügedən şəxslərin hər birinə donor köçürülüb və onlar sağlamlıqlarına qovuşublar. Həmin şəxslərdən ən uzun müddət tam süni ürəklə yaşayan 27 belə gün keçirməli olub.

Süni ürək noyabrın 22-də Sidneydəki Müqəddəs Vinsent xəstəxanasında ürək-damar və transplantasiya cərrahı Paul Jans tərəfindən 6 saatlıq əməliyyat zamanı avstraliyalı xəstənin bədəninə implantasiya edilib.

Cihaz Kaliforniyada yerləşən BiVACOR şirkəti tərəfindən hazırlanıb. İxtira, sağlam ürəyin təbii qan axınını təqlid etmək üçün maqnit levitasiya texnologiyasından istifadə edərək, insan ürəyini tamamilə əvəz edə bilən dünyada ilk belə texnologiyadır.

Hələ erkən klinik sınaqlarda olan implant, adətən digər şərtlər, ən çox infarkt və koronar arteriya xəstəlikləri ürəyi zədələdikdə və ya zəiflədikdə inkişaf edən son mərhələdə biventrikulyar ürək çatışmazlığı olan xəstələr üçün hazırlanır.

BiVACOR-un qurucusu, atası ürək xəstəliyindən öldükdən sonra cihazı ixtira edən avstraliyalı biomühəndis Daniel Timms deyir ki, onilliklərlə davam edən prosesin uğurlu olduğunu görmək şok edici mənzərədir.

Qeyd edək ki, dünyada hər il orta hesabla 23 milyondan çox insan ürək çatışmazlığından əziyyət çəksə də, onlardan sadəcə 6 mininə donor ürək tapılır.