Qlobal istiləşmə Avropanın iqliminə getdikcə daha ciddi təsir göstərir və bəzi ölkələrdə yay ayları dözülməz olur.

"DogruXeber.az" xəbə verir ki, İspaniyanın hava şəraiti ilə bağlı problemi "The Olive Press” nəşri diqqətə çatdırıb.

İspaniyalı meteoroloq Mario Pikaso xəbərdarlıq edib ki, qarşıdakı günlərdə Barselonada temperatur kölgədə 50 dərəcə Selsiyə çata bilər.

"Barselona şəhəri bu senariyə hazırlaşır, çünki ekstremal istilər elektrik enerjisinin kəsilməsi, şəhər mobilliyinin pozulması və dərmanlara çıxışın məhdudlaşdırılması kimi nəticələrə səbəb ola bilər”, deyə Pikaso bildirib.

Ekspert qeyd edib ki, istilik xüsusilə şəhər mühitində daha da güclənir. Bu hadisə "şəhər istilik adaları” kimi tanınır.

"Küçə və yol asfaltı, binalarla birlikdə istiliyi saxlayır və havada isti hava kütlələrinin axını ilə onsuz da yüksək olan temperaturlara əlavə dərəcələr qatır – bu isə yay aylarında yayılmış bir haldır”, deyə o izah edib.

Pikasoya görə, Barselona və digər Aralıq dənizi şəhərlərində yay fəslinin "getdikcə daha isti və havasız” keçməsinin əsas səbəblərindən biri də dəniz suyunun temperaturunun artmasıdır. Bu isə havadakı rütubətliliyin yüksəlməsinə gətirib çıxarır. Bildiyimiz kimi, rütubətli hava şəraitində istilik daha ağır hiss olunur.

Bütün bunları nəzərə alaraq, Barselona Şəhər Şurası 2035-ci ilə qədər 11,6 milyon avro büdcəsi olan "İsti hava planı” üzərində işləyir. Plan, sahil şəhərində temperaturun artması fonunda "iqlim sığınacaqlarının” sayının artırılmasını nəzərdə tutur.

"Buradakı məqsəd əldə edilmiş təcrübəni və qurulmuş sistemləri mərhələli şəkildə həyata keçirməkdir. Şəhər getdikcə daha tez-tez və daha uzun sürən istilik dalğaları ilə üzləşir”, deyə Pikaso bildirib.

Qeyd edək ki, İsveçrədə məşhur Alp buzlaqları ciddi "xəsarət almağa” başlayıb – onlar indi daha çox nəhəng dəlikləri olan İsveçrə pendirini xatırladır.

Bundan başqa, səma buludlarının yoxa çıxması ilə bağlı narahatedici tendensiyadan da danışılıb – bu həm qlobal istiləşmənin nəticəsi, həm də onu daha da gücləndirən amildir.