Bakıda kirayə ev qiymətləri sürətlə artır. Bu artım xüsusilə gənclər üçün mənzil problemi yaradır. Yeni ailə quranlar, tələbələr, təzə işə başlayan gənc mütəxəssislər münasib qiymətə kirayə mənzil tapmaqda ciddi çətinlik çəkirlər.

"DogruXeber.az"ın araşdırmasına əsasən, Azərbaycan əmlak bazarında son bir ildə qiymətlərdə 20-30 faiz arasında artım qeydə alınıb. Ən çox bahalaşma Bakı, Gəncə və Sumqayıt kimi iri şəhərlərdə müşahidə olunur. Xüsusilə Bakı kirayə mənzil bazarı tələbə axını və əmlak təklifi arasında balanssızlıq səbəbindən kəskin dəyişib.

Məsələn, ötən il 1 otaqlı mənzillər Bakıda orta hesabla 350 AZN civarında idisə, 2025-ci ilin yay aylarında bu rəqəm artıq 450-500 AZN-ə çatıb. Eyni tendensiya digər şəhərlərdə də izlənir.

Əmlak məsələləri üzrə ekspertlər bildirirlər ki, kirayə qiymətlərində artım təkcə inflyasiya ilə deyil, həm də əmlak bazarına nəzarətin zəif olması ilə bağlıdır. Bəzi ev sahibləri süni şəkildə qiymətləri qaldırır və real bazar dəyərlərinə uyğun olmayan məbləğlər tələb edirlər.

Tələbələr üçün ev problemi isə xüsusi vurğulanmalıdır. Universitetlərdə əyani təhsil tam bərpa olunduğundan tələbə sayı artıb, lakin tələbə yataqxanalarının sayı ehtiyaca uyğun deyil. Bu da tələbələri şəxsi evlərə üz tutmağa məcbur edir.

Yeni ailə quran Səbinə Quliyeva "DogruXeber.az"a deyir: “İki otaqlı normal ev üçün ən azı 600 manat istənilir. Aylıq gəlirimiz bu qədər kirayə və kommunal xərcləri qarşılamağa çatmır.”

Azərbaycan kirayə bazarı hazırda nəzarətsiz şəkildə genişlənir. Ekspertlər bildirirlər ki, dövlət tərəfindən gənclər üçün sosial kirayə proqramları yaradılmasa, bu problem daha da dərinləşəcək. Eyni zamanda, bakıda ucuz kirayə evlər mövcud olsa da, onların əksəriyyəti yaşayış üçün yararsız vəziyyətdədir.