Azərbaycanda marketlərdə satışda olan bəzi qida məhsulları, görünməz təhlükə daşıyır. Müxtəlif qatqı maddələri, düzgün saxlanmayan məhsullar və tərkibi insan sağlamlığı üçün riskli olan ərzaqlar gündəlik rasionumuza daxil olsa da, çox az adam onların fəsadlarından xəbərdardır.

"DogruXeber.az" olaraq aparılan müşahidələr və mütəxəssis rəyləri göstərir ki, bəzi ucuz məhsulların tərkibində orqanizmə təhlükəli təsir göstərən maddələr aşkar edilir. Qidalanma üzrə ekspertlər bildirirlər ki, tərkibində E621 (mononatrium qlutamat), E110, E951 (aspartam) və digər kimyəvi əlavələr olan məhsullar uzunmüddətli istehlak zamanı xərçəng, hormonal pozuntular və sinir sistemi problemləri yarada bilər.

Ən çox risk daşıyan məhsul kateqoriyaları bunlardır:

Ucuz kolbasa və sosislər: Tərkibində çoxlu konservant və ət əvəzinə soya + nişasta qarışığı.

Hazır şirniyyatlar və rəngli içkilər: Süni boyalar, şəkər əvəzediciləri və karbohidrat yükü yüksəkdir.

Qablaşdırılmış çips və qəlyanaltılar: E621, trans yağlar və kanserogen maddələr ehtiva edir.

Ucuz ət və toyuq məhsulları: Bəzən antibiotiklərlə yetişdirilmiş heyvan ətləri satışa çıxarılır.

Saxlama müddəti uzun olan “süd məhsulları” – xüsusilə ucuz qiymətə olan və otaq temperaturunda saxlanılan məhsullar.

Ərzaq təhlükəsizliyi üzrə mütəxəssis Rəşad Hüseynov DogruXeber.az-a açıqlamasında bildirir:

“Bir çox ucuz ərzaqlar laboratoriyalardan keçmir və tərkibindəki qatqılar heç etikətdə göstərilmir. Bu, həm qanunsuzdur, həm də ciddi sağlamlıq riskidir.”

Təəssüf ki, əhalinin böyük hissəsi ucuzluğa üstünlük verdiyi üçün bu məhsullar geniş şəkildə alınır. Xüsusilə şagirdlər və tələbələr arasında enerji içkiləri, rəngli şirniyyatlar və çipslər yüksək tələbat görür. Halbuki bu məhsulların bir qismi BMT-nin Qida və Kənd Təsərrüfatı Təşkilatı (FAO) və ÜST tərəfindən də potensial təhlükəli qida kimi dəyərləndirilib.

Qida təhlükəsizliyi agentliyinin məlumatına görə, yalnız 2025-ci ilin ilk 5 ayında 400-ə yaxın ərzaq məhsulu yoxlanılıb, onlardan 78-i normativlərə uyğun olmayıb. Bəzi hallarda məhsulların tərkibində icazə verilməyən maddələr və saxtalaşdırılmış tərkib aşkarlanıb.

Bu problem təkcə istehlakçıya deyil, eyni zamanda bazarın etibarlılığına da zərbə vurur. Ekspertlər hesab edirlər ki, qida təhlükəsizliyi üzrə ictimai nəzarət gücləndirilməli, etiketlərdə şəffaflıq təmin olunmalı, həmçinin məktəblərdə uşaqlara qida mədəniyyəti ilə bağlı maarifləndirmə dərsləri keçirilməlidir.