gundem / siyaset / iqtisadiyyat / sosial
25.11.2021, 14:28
Gəlirimiz artıb, yoxsa pullar "yastıq altından" çıxır? - NƏ BAŞ VERİR?
DogruXeber.az: - Əhalinin banklardakı əmanətlərinin həcmində ötən illə müqayisədə artım qeydə alınıb.
Azərbaycan Mərkəzi Bankının məlumatına görə, fiziki şəxslərin banklardakı əmanətlərinin həcmi ötən ilin müvafiq dövrünə nəzərən 12,9 faiz, oktyabr ayı ərzində isə 49 300 000 manat məbləğində artıb.
Onların əmanətlərinin 56,7 faizi milli valyutada, 43,3 faizi isə xarici valyutada olub. Manatla olan əmanətlərin həcmi oktyabr ayında da xarici valyutada olan əmanətlərin həcmini üstələyib.
Bəs bu artımların səbəbi nədir? Əhalinin gəlirləri artıb, yoxsa banklara etibar yenidən bərpa olunur? Əhali niyə manat əmanətlərinə maraq göstərir?
Bank məsələləri üzrə ekspert Əkrəm Həsənov Cebhe.info-ya açıqlamasında deyib ki, ötən illə müqayisədə bu il əmanətlərin həcminin artması pandemiya ilə bağlı məsələdir:
“Ötən il pandemiyanın pik dövrünü yaşayırdıq. Ona görə də əhalinin bir hissəsi əmanətlərini banklardan geri çəkirdir. Yumşalmalardan sonra isə artıq çəkilən əmanətlərin bir hissəsi yenidən banklara qayıtdı və o artım məhz bununla bağlıdır”.
Əkrəm Həsənov əlavə edib ki, oktyabr ayı üzrə olan artımın səbəbi isə dünya bazarında neft qiymətlərinin bahalaşması olub:
“Payız aylarında artıq məlum oldu ki, bazarda neft bahalaşacaq. Bu isə manatın mövqeyini gücləndirən əsas amildir. Digər tərəfdən banklar dollar əmanətlərinə çox aşağı faiz təklif edir.
Manat əmanətlərinin faizi isə yüksəkdir. Ona görə də əhali dollarla deyil, məhz manat əmanətlərinə üstünlük verir. Amma bu, hələ banklara etimadın bərpa olunduğunu deməyə əsas vermir. Əgər bu artımlar tendensiya halını alarsa, ancaq o zaman banklara etimadın artığını demək olar”.